Mólendi

Mólendi hefur um aldir einkennt stór svæði á landinu og þar er víða að finna miklar sögulegar minjar. Mólendi er verðmætt fyrir margar villtar lífverur, einkum fuglategundir sem Ísland ber sérstaka ábyrgð á eins og heiðlóu, lóuþræl, jaðrakan, stelk og spóa. Mólendi er að jafnaði tegundaríkast allra vistlenda hvað varðar æðplöntur, mosa og fléttur og kolefnismagn í jarðvegi er yfirleitt verulegt. Gróðursetning trjáa í mólendi gerbreytir aðstæðum og veldur mikilli röskun á lífríki þeirra, þ.m.t. eyðileggingu búsvæða fugla.

Aldrei ætti að rækta skóg á vistgerðum með hátt verndargildi. Endurheimt birkiskóga kemur allvíða til greina í mólendi, þá sérstaklega ef gróðurþekja og/eða tegundafjölbreytni er lítil.